Vör langer Zitt stond op Schwarzermech e Schloß met decke schwor Mure, ronderöm wor ene Wasserjrav. Op de Burg wonde ene elemenzig ondöge Ritter, hä hech Bruno. Met Jodd un alle Man hot hä Krach, ever et meetste stoch häm dat rich Kluster va Mönster en de Oore. Dök holde hä sich des nahts e Renk or e Pääd vajen Klusterwee. Dodörch kom der Krach tösche häm un et Kluster. Ens hot hä esujar 5 Mönche jefange un en et Burgverließ jeworpe. Evve de Strof Joddes blev net uus. No etlije Dag jeng hä op de Jagd, dobei fel hä van et Pääd un broch sich der Hals. Nu wor hä dud, ever sing Sill kom doch net zor Roh. Der Ritter moot en Hondsjestalt em Kellerjewölf setze, mä des naats, va 12 - 1, moot hä met schwor Kettens dorch Dorp trecke. Alles wat dat Kettespektakel hoot, made sich flott us der Stöp.